అగ్ని-5 బాలిస్టిక్‌ మిస్సైల్‌ను విజయవంతం

రక్షణ రంగంలో అగ్రదేశాలతో పోటీపడుతున్న భారత్‌ మరో విజయాన్ని సాధించింది. 5 వేల కిలోమీటర్ల లక్ష్యాలను సైతం ఛేదించగల

అగ్ని-5 బాలిస్టిక్‌ మిస్సైల్‌ను విజయవంతంగా పరీక్షించి అమెరికా ఆంక్షలను జయించింది. ఒడిషాలోని వీలర్‌ ఐలాండ్‌ నుంచి అగ్ని-5ను మరోసారి పరీక్షించి ఈ విజయం సాధించింది. వైఫల్యాలు ఎరగని రక్షణ పరిశోధనా రంగ అభివృద్ధి సంస్థ ఇప్పుడు అగ్ని సీరిస్‌ 5 తో ఈ విజయాన్ని సొంతం చేసుకుంది. ఈ బాలిస్టిక్‌ మిస్సైల్‌ అణ్వాయుధాలను కూడా తీసుకెళ్లే శక్తి కలిగి ఉంటుంది. భారత్‌ సొంత పరిజ్ఞానంతో ఈ క్షిపణిని రూపొందించారు. ఐఎన్‌ఎస్‌ అరిహంత్‌ సబ్‌ మెరైన్‌ ద్వారా దీనిని ప్రయోగించడానికి రక్షణ శాఖ అవసరమైన ఏర్పాట్లు సిద్దం చేస్తోంది.
అమెరికా ఆంక్షలపై విజయం..
  అగ్రరాజ్యం అడ్డుకున్నా మనదేశం రక్షణ రంగంలో దూసుకెళ్లింది. అగ్ని- 5ను మరోసారి విజయవంతంగా పరీక్షించింది. దేశీయ సైనిక పాటవాన్ని ప్రపంచానికి చాటి చెప్పింది. అత్యాధునిక ఆయుధ సంపత్తిలో భారత్‌ అగ్రదేశాలకు ధీటుగా ఎదుగుతోంది. రక్షణ పరిశోధనా అభివృద్ధి సంస్థ మరోసారి బాలిస్టిక్‌ మిస్సైల్‌ను విజయవంతంగా పరీక్షించింది. త్వరలోనే ఇది రక్షణరంగంలోకి రానుంది. ఈ క్షిపణి ద్వారా చైనాయే కాదు యూరప్‌ వంటి దేశాలంత దూరాన ఉన్న ఐదువేల కిలోమీటర్ల దూరాన ఉన్న లక్ష్యాలను కూడా ఛేదించగలం.
అత్యాధునికమైన ఖండాంతర్గత క్షిపణి..
  భారతదేశం ఇంటిగ్రేటెడ్ గైడెడ్‌ మిస్సైల్ డెవలప్‌మెంట్‌ కార్యక్రమం కింద అగ్ని-5, పృథ్వీ, ఆకాశ్‌, త్రిషూల్‌, నాగ్‌, అనే క్షిఫుణులను తయారుచేసింది. ఇందులో ఈ అగ్ని క్షిపిణి అత్యాధునికమైంది. ఈ అగ్ని క్షిపిణిపై అమెరికా ఆంక్షలు విధించింది. అయినప్పటికీ అగ్రరాజ్యం విసిరిన సవాల్‌ను భారత శాస్త్రవేత్తలు స్వీకరించారు. భారతదేశం తమంతట తాముగా అణ్వాయుధాలను ప్రయోగించే స్థాయికి ఎదిగింది. కనీస అణునిరోధక సామర్థ్యాన్ని కలిగి ఉండాలనే మన విధానంతో పోటీ పడింది. ఇందులో భాగంగానే అవసరమైతే అణ్వాయుధాలను కూడా మోసుకెళ్లే సామర్థ్యం ఉన్న క్షిపుణులను తయారుచేసుకుంది. దీని ద్వారా న్యూక్లియార్‌ డిటరెన్స్ ను సాధించే దిశగా భారత్ అడుగులు వేసిందని రక్షణ నిపుణులు ఈ ప్రయోగాన్ని విశ్లేషిస్తున్నారు. భారత్ లో తొలిసారిగా 2012లో ఈ క్షిపణిని పరీక్షించారు. తాజాగా ఈ క్షిపిణి ప్రయోగాన్ని రెండోసారి కూడా విజయవంతం చేశారు. మరికొన్ని పరీక్షల అనంతరం 2017లోపు ఈ క్షిపిణిని రక్షణ బలగాలకు అందజేయనున్నారు. ఖండాంతర క్షిపిణికి దగ్గరగా ఉన్న ఈ ఆధునిక మిస్సైల్‌ త్వరలో మన సైనిక బలగాల అమ్ముల పొదిలో చేరనుంది.