మలాలాకు అమ్నెస్టీ అవార్డు

పాకిస్తానీ బాలిక, విద్యాహక్కుల ప్రచారకర్త మలాలా యూసుఫ్‌జారుకు అమ్నెస్టీ ఇంటర్నేషనల్‌ అవార్డు లభించింది. అమ్నెస్టీకి చెందిన ఆత్మవివేచన దూత (అంబాసిడర్‌ ఆఫ్‌ కన్‌సైన్స్‌) అవార్డును 2013 సంవత్సరానికి గానూ మానవ, సామాజిక హక్కుల కార్యకర్త హేరీ బెలాఫాంటేతో కలిసి ఆమె పంచుకుంటున్నారు. తమ జీవితాంతం మానవ హక్కుల కోసం పోరాడే వ్యక్తులను గుర్తించి మానవ హక్కుల గ్రూపు ఇచ్చే అత్యున్నత గౌరవ పురస్కారం ఇది. ఐర్లాండ్‌లోని డబ్లిన్‌లో మంగళవారం సాయంత్రం జరిగిన కార్యక్రమంలో ఈ అవార్డును అందచేసినట్లు అమ్నెస్టీ ఇంటర్నేషనల్‌ ఒక పత్రికా ప్రకటనలో పేర్కొంది. ఈ అవార్డు కింద తాము ఎంపిక చేసిన ఇద్దరు రాయబారులు కూడా వివిధ రకాలుగా పూర్తి వైవిధ్యం వున్నవారని అమ్నెస్టీ ప్రధాన కార్యదర్శి సలీల్‌ శెట్టి ఆ ప్రకటనలో తెలిపారు. అయితే వారు ఎంత వైవిధ్యమున్నా కూడా అందరి హక్కుల కోసం పోరాడుతూ తమ జీవితాలను దానికే అంకితం చేశారని అన్నారు. న్యాయం పొందడం, హుందాగా జీవితాన్ని గడపడం అనేది ప్రతి ఒక్కరికీ వున్న సార్వజనీన హక్కని, ఈ హక్కుల అమలు కోసం వారు పోరాడుతున్నారని, ఇతరులకు ఆదర్శంగా కూడా నిలుస్తున్నారని ప్రశంసించారు. స్త్రీ, పురుషలనే బేధం లేకుండా అందరికీ విద్య అందుబాటులో వుండాలని మలాలా పోరాడుతోంది. ఈ అవార్డు అందుకోవడం నిజంగా తనకు ఎంతో గౌరవమని మలాలా వ్యాఖ్యానించారు. ప్రపంచవ్యాప్తంగా ఎక్కడో ఒకచోట, ఏదో ఒక మారుమూల స్కూలుకు వెళ్ళడానికి తనలాగే ప్రతి రోజూ పోరాడుతున్నవారు లేకపోలేదు. వాళ్ళందరినీ గుర్తు చేసుకోవడానికి ఇదొక చిన్న అవకాశమని అన్నారు. మనందరం కలిసి పోరాడితే ఏదో ఒక నాటికి అందరికీ విద్య అందుబాటులోకి వస్తుందని అన్నారు. మలాలాతో కలిసి అవార్డు పొందిన హేరీ బెలాఫాంటే మాట్లాడుతూ మానవతావాద ప్రయోజనాలకే తన జీవితం అంకికతమని చెప్పారు. సిరియా సాయుధ ఘర్షణల్లో బలవుతున్న చిన్నారుల దుస్థితిపై తాను దృష్టి సారించినట్లు చెప్పారు. తమ కాలంలో నిజమైన యోధురాలైన మలాలాతో కలిసి అవార్డు పంచుకోవడం, అందుకోవడం తనకెంతో ఆనందం కలిగించిందన్నారు.