చరిత్రను మార్చే ప్రయత్నం - కమ్యూనిస్టులు

దొరలను చూసి వణికిన జనం ఆ దొరలనే గడగడలాడించారు. నిజాం నవాబు, దొరలు కలిసి జరిపిన నరమేధానికి ఎర్రజెండా ఎదురొడ్డి నిలిచింది. రైతులు..

రజాకర్లపై విరుచుకు పడ్డారు. నిజాం రాజరిక పాలనకు వ్యతిరేకంగా జనమంతా ధ్వజమెత్తారు. ప్రాణాలను పణంగా పెట్టి నవాబులను తరిమికొట్టారు. దొరలకు కాళ్లు మొక్కినవారే.. వారికి గోరీ కట్టే వరకు వెళ్లారు. ఎరుపెక్కిన ప్రజా యుద్ధానికి భయపడిన నిజాం నవాబులు భారత ప్రభుత్వం మందు మోకరిల్లారు. కుల, మత, వర్గ, ప్రాంత భేదాలకు వ్యతిరేకంగా జరిగిన తెలంగాణ సాయుధ పోరాటానికి నేటితో సరిగ్గా 65 సంవత్సరాలు. నాటి భూస్వామ్య వ్యతిరేక రైతాంగ సాయుధ పోరాటాన్ని ఓ సారి స్మరిద్దాం.
నిజాం పాలన
  భారత సైన్యం హైదరాబాద్ సంస్థానాన్ని సెప్టెంబరు 17, 1948వ సంవత్సరంలో స్వాధీనం చేసుకుంది. అంటే దేశానికి స్వాతంత్ర్యం వచ్చిన ఏడాది తర్వాత హైదరాబాద్ భారత్ లో కలిసింది. అప్పటిదాకా హైదరాబాద్ సంస్థానం నిజాం పాలనలోనే మగ్గింది. ఈ ప్రాంతం నిజాం పాలనలోనే కొనసాగేలా నెహ్రూ ప్రభుత్వం ఒప్పందం చేసుకుంది. అప్పటికే భూస్వామ్య దొరతనం నడుస్తుంది. దొరలు.. జీతగాళ్లతో వెట్టిచాకిరీ చేయిస్తున్నారు. నాటి ప్రజలకు సొంత భూమి లేదు. భ్యూస్వామ్య, దేశ్ ముఖ్ లు భూములను కౌలుకిస్తే రెక్కలు ముక్కలు చేసుకుని పంట పండించేవారు. అయినా వీరికి నాలుగు తిండిగింజలు లభించడం కూడా కష్టంగా ఉండేది. పండిన పంటనంతా దొరలు ఎత్తుకుపోయేవారు. గ్రామాలన్నీ దొరల పాలనలోనే ఉండేవి. నిజాం నవాబు, దొరలు చేతులు కలిపారు. నిజాంకు సంస్థానంపై అధికారం కావాలి. దొరలకు పెత్తనం కావాలి. బానిసలుగా బతుకుతున్న జనం ఎప్పటికీ అలాగే మగ్గిపోవాలి. ఈ ఆలోచనలతోనే దొరలు నిజాం నవాబులతో దోస్తీ చేశారు. నిజాం అండతో మరింత రెచ్చిపోయారు. రైతులు కష్టపడి పండించిన పంటలను సైతం అప్పనంగా లాగేసుకున్నారు. న్యాయం అడిగితే గుండెలపై తన్నేవారు. ఆడవాళ్లపై ఆకృత్యాలకు పాల్పడ్డారు. ఎదిరించిన వారి ప్రాణాలు తీశారు. నోరెత్తిన వారి నాలుకలు కత్తిరించారు. ఈ క్రమంలో ప్రజల్లో దొరలపై కసి పెరిగింది. దొరల అంతం కోసం వారు ఎదురుచూశారు. పట్టరాని ఆగ్రహాన్ని దిగమింగుకుంటూనే తలలు వంచి పనిచేసుకుంటున్నారు. కానీ దొరలపై అందరి మనసుల్లోనూ ఆగ్రహావేశాలు వెల్లువెత్తాయి.
కమ్యూనిస్టుల అండ
 ఈ సమయంలో వారికి ఎర్రజెండా దారి చూపించింది. సమస్యలపై కమ్యూనిస్టులు పోరాటానికి దిగారు. నిజాం నవాబు, దొరల కుయుక్తులను ప్రజలకు తెలియపరిచారు. దొరల దోపిడీ గురించి వివరించారు. వెట్టిచాకిరీ ఎంత అమానుషమో చెప్పారు. అప్పటికే దొరలపై ఆగ్రహంతో ఉన్న ప్రజలకు కమ్యూనిస్టుల రూపంలో ఓ అండ దొరికినట్లైంది. కమ్యూనిస్టులు చెప్పిన విషయాలతో ప్రజలు చైతన్యవంతులయ్యారు. ఈ సమయంలో ముందు ప్రజలకు కమ్యూనిస్టులు అక్షర జ్ఞానాన్ని అందించారు. తలవంచుకుని బతికిన వారి చేతికి ఆయుధాలు ఇచ్చారు. దొరలను అంతం చేస్తే తప్ప తమ బానిస బతుకుల నుండి బయటపడలేమని నిర్ణయించుకున్నారు. దీంతో ఓ సంఘం వెలిసింది. ప్రజలు దేశ్ ముఖ్ గూండాలను తరిమికొట్టారు. దొరల అహంకారానికి సమాధానం చెప్పారు. ఎర్రజెండా అండతో దొరలకు ఎదురునిలిచారు. కమ్యూనిస్టులతో కలిసి భూ స్వాములను నిలదీశారు. వెట్టిచాకిరి చేయమని తేల్చి చెప్పారు. తాము సాగు చేస్తున్న భూమి తమదే అని తెగేసి చెప్పారు. 'దున్నే వాడిదే భూమి' అనే నినాదం ఈ సమయంలో మారుమోగింది.
రజాకార్ల దాడులు
 దీంతో దొరల్లో దడ పుట్టింది. వెంటనే వారు నిజాం నవాబుల వద్దకు పరుగుతీశారు. రక్తం పారించైనా తమ పెత్తనం సాగించుకోవాలని కుట్రలు పన్నారు. రజాకార్ల పేరుతో సైన్యం ఏర్పాటుకు రంగం సిద్ధం చేసుకున్నారు. కమ్యూనిస్టులనేవారు కనపడకుండా చేయాలనుకున్నారు. ఎదురు తిరిగిన వారందరినీ అంతమొందించాలని నిర్ణయించుకున్నారు. కులాల పేరుతో, మతాల పేరుతో ప్రజలను చీల్చే ప్రయత్నం చేశారు. ఈ క్రమంలో రజాకార్లు ఊర్లమీద పడి ప్రజలను ఊచకోత కోశారు. దీంతో నెత్తురు ఏరులై పారింది. ఉద్యమకారులు ప్రాణత్యాగాలు చేసి అమరవీరులయ్యారు. ఆడవారిపై మరిన్ని దాడులు జరిగాయి. తెలంగాణ అంతా అట్టుడికిపోయింది. దొడ్డి కొమరయ్య, ఆరుట్ల కమాలాదేవి, భీంరెడ్డి నర్సింహరెడ్డి, మల్లు స్వరాజ్యం లాంటి వీరులు పోరాటాలు చేశారు. మహిళలు సైతం తుపాకులు ఎక్కుపెట్టారు. రైతాంగ సాయుధ పోరాటం ఉధృతమైంది. రజాకార్లకు ప్రజలు ఎదురునిలిచారు. తోటి ఉద్యమకారులు ప్రాణాలు కోల్పోతున్నా.. పోరాటం మాత్రం ఆపలేదు. ఓ ఉద్యమ కారుని మరణం వేలాది మందిలో పోరాట స్ఫూర్తిని రగిల్చింది.
సుందరయ్య నాయకత్వం
 మతం పేరుతో చిచ్చు పెట్టాలనుకున్న దొరల ఎత్తుగడ పారలేదు. మగ్దూర్ మొయిద్దీన్, అక్బర్ అలీ లాంటి కార్మిక నేతలు తెలంగాణ పోరాటంలో కీలక పాత్ర పోషించారు. మతాన్ని పక్కన పెట్టి దొరలు, నవాబు కుట్రలను ప్రజలకు వివరించారు. మత భేదాలను సృష్టించే ప్రయత్నాన్ని తిప్పికొట్టారు. సాయుధ పోరాటానికి ఆంధ్రా ప్రాంతంలోని సర్కారు, సీమ ప్రజలు అండగా నిలిచారు. తెలంగాణ ప్రజలు వెట్టిచాకిరీ నుండి బయట పడాలని ఆంధ్రా ప్రజలు కోరుకున్నారు. సుందరయ్య లాంటి మహా నాయకులు ఈ పోరాటానికి నాయకత్వం వహించారు. అనేక మంది ఆంధ్రా ప్రాంత నాయకులు వీర తెలంగాణ పోరాటంలో అశువులుబాశారు. ఆ రోజుల్లో 'మా భూమి' నాటకాన్ని ఆంధ్రా ప్రాంతంలో ప్రదర్శించి దానికి వచ్చిన ఆదాయాన్ని తెలంగాణ సాయుధ పోరాట ఉద్యమానికి వినియోగించారు. ఇలా కుల, మత, ప్రాంత భేదాలు లేకుండా ప్రజలు దోపిడీ వర్గాలపై కలసికట్టుగా తిరగబడ్డారు.
రంగంలోకి దిగిన భారత సైన్యం
 వీర తెలంగాణ విప్లవ పోరాటంతో భూస్వాములకు దిక్కుతోచలేదు. ఉద్యమ కారుల నినాదాలతో, సాయుధ పోరాటాలతో నిజాం నవాబుకు ఊపిరి ఆడలేదు. ఎర్ర జెండాల నీడలో సాగుతున్న ఈ పోరాటం వైపు చూడటానికి కూడా దొరలు భయపడ్డారు. ఈ క్రమంలో భారత ప్రభుత్వమే తమను ఆదుకుంటుందని నిజాం నవాబులు అనుకున్నారు. అధికార కాంగ్రెస్ పార్టీ అండకోసం నెహ్రూ ప్రభుత్వం ముందు మోకరిల్లారు. హైదరాబాద్ సంస్థానాన్ని భారత ప్రభుత్వానికి అప్పగించారు. దీంతో భారత సైన్యం రంగంలోకి దిగింది. హైదరాబాద్ సంస్థానాన్ని స్వాధీనం చేసుకుంది. సైన్యం కమ్యూనిస్టులపై తూటాలు పేల్చింది. సాయుధ పోరాటం చేసిన వారిపై దాడులు మొదలయ్యాయి. నిజాం నవాబు, దొరల మారణకాండను మించిన దమనకాండ మొదలైంది. కమ్యూనిస్టులను ఏరిపారేయడమే లక్ష్యంగా భారత సైన్యం తెలంగాణ ప్రాంతంలో దాడులు జరిపింది. బుల్లెట్ల వర్షం కురిపించింది. నిజాం పాలన పోయినా భూమి కోసం జరిగిన సాయుధ పోరాట లక్ష్యం నెరవేరలేదు. భూ స్వాముల పెత్తనం తప్పలేదు. దొరల రూపం మారింది. దోపిడీ ఆగలేదు. వెట్టి చాకిరీ పోయినా ఇంకా కొన్ని రూపాల్లో అది కనబడుతూనే ఉంది. కుల వివక్ష నేటికీ కొనసాగుతూనే ఉంది.
చరిత్రను మార్చే ప్రయత్నం - కమ్యూనిస్టులు
 ఎర్ర జెండా అండతో మారిన తెలంగాణ ప్రజల బతుకులను, అరుణ పతాకం నీడలో సాగిన వీర తెలంగాణ విప్లవ సాయుధ పోరాట చరిత్రను మార్చే ప్రయత్నం జరుగుందని లెఫ్ట్ నాయకులు విమర్శిస్తున్నారు. రాచరికానికి, వెట్టి చాకిరికి వ్యతిరేకంగా భూమికోసం, భుక్తికోసం జరిగిన సాయుధ పోరాటాన్ని నేటి విభజన, ఆందోళనకు ముడి పెడుతున్నారు. ఆనాడు దారుణ మారణకాండకు పాల్పడిన నిజాం నవాబును కీర్తిస్తున్నారు. అలనాటి దొరలకు వకాల్తా పుచ్చుకుంటున్నారు. ముస్లిం నవాబు, హిందూ మతంపై దాడి చేస్తే జరిగిన తిరుగుబాటుగా తెలంగాణ పోరాటాన్ని మరికొందరు చిత్రీకరిస్తున్నారు. ఇవన్నీ వక్రీకరణలే అని వామపక్ష నేతలు మండిపడుతున్నారు. నిజాం నవాబు, దొరలు, దేశ్ ముఖ్ ల హింసాకాండకు, రాక్షస దమనకాండకు ఎదురొడ్డి ఎర్రజెండా అండగా పోరాడి అసవులు బాసిన వేలాది అమర వీరులను స్మరించుకుంటూ, పాలకుల కుట్రలను ఛేదించుకుని ప్రజలకు నిజమైన అభివృద్ధిని అందిచిన నాడే చారిత్రక వీర తెలంగాణ విప్లవ సాయుధ పోరాటానికి అసలైన నివాళులు అర్పించిన వారిమవుతామని కమ్యూనిస్టులు స్పష్టం చేస్తున్నారు.