రాగుల‌తో ర‌క‌ర‌కాలు

ఈ ఆధునిక కాలంలో తృణధాన్యాలపై ఆసక్తి, మక్కువ ప్రజల్లో పెరిగింది. మారిన జీవన విధానం, ఆహారపు అలవాట్లతో పేర్లు కూడా తెలియని ఎన్నో
రోగాలు మనల్ని చుట్టుముడుతున్నాయి. వాటన్నింటికీ విరుగుడు ఈ తృణధాన్యాలు. వేసవిలో ఎక్కువగా ఉపయోగించే ధాన్యాలు రాగులు. అందరికి అందుబాటులో ఉండేవి కూడా ఇవే. అరుగుదలకు సహకరించే రాగులతో చేసిన వంటకాన్ని తిన్న తర్వాత ఆకలి కూడా అనిపించదు. అందుకే ఆధిక బరువుతో బాధపడేవారు బరువు తగ్గడానికి రాగులను ఎక్కువగా వినియోగిస్తున్నారు. ఎన్నో పోషకాలున్న రాగులతో సంప్రదాయక వంటకాలైన ఇడ్లీ, దోశ, రోటి, చక్రాలు, బిస్కెట్లు , లడ్డు లాంటివి కూడా చేసుకోవచ్చు. వేసవి కూడా మొదలైంది. మరి రాగులతో చేసుకునే వంటకాల్ని చూద్దామా మరి!
హల్వా
కావలసిన పదార్థాలు: రాగులు - కప్పు, బెల్లం - అర కప్పు, కొబ్బరి తురుము - మూడు టేబుల్‌ స్పూన్లు, యాలకుల పొడి - టీ స్పూను, నెయ్యి - టేబుల్‌ స్పూను, ఉప్పు - చిటికెడు
తయారుచేసే పద్ధతి: రాగుల్ని రెండు మూడు గంటల పాటు నీళ్ళలో నానబెట్టాలి. పైన చెప్పిన పదార్థాలన్నింటినీ మిక్సీలో వేసి కొద్దిగా నీళ్ళు పోసి మెత్తగా రుబ్బాలి. ఈ మిశ్రమాన్ని పలుచని బట్టలో వేసి పిండితే పాలు వస్తాయి. ఈ పాలను మందమైన వెడల్పాటి గిన్నెలో పోసి మిశ్రమం కాస్త గట్టి పడే వరకూ గరిటెతో తిప్పాలి. తర్వాత నెయ్యి , యాలకుల పొడి వేసి కలపాలి. హల్వా రూపం సంతరించుకున్న తర్వాత స్టౌవ్‌ మీద నుండి దించి, నెయ్యి లేదా నూనె రాసిన పళ్లెంలో ఈ మిశ్రమాన్ని పోయాలి. ఆ తర్వాత మీకు నచ్చిన ఆకారంలో కట్‌ చేసకోవచ్చు లేక అలాగే బౌల్‌లోకి తీసుకుని జీడిపప్పులతో అలంకరించి సర్వ్‌ చేయండి. ఈ హల్వాని పిల్లలు ఎంతో ఇష్టంగా తింటారు.
లడ్డు
కావలసిన పదార్థాలు: రాగి పిండి - రెండు కప్పులు, తెల్ల నువ్వులు - కప్పు, కొబ్బరి తురుము - కప్పు, వేరుశనగపప్పు - కప్పు, బెల్లం తురుము - రెండున్నర కప్పులు, నెయ్యి - మూడు టేబుల్‌ స్పూన్లు, యాలకులు పొడి- స్పూను, ఉప్పు - తగినంత.
తయారుచేసే పద్ధతి: నువ్వులు, కొబ్బరి తురుములను వేర్వేరుగా చిన్న మంటపై దోరగా వేయించుకొని, పక్కన పెట్టుకోవాలి. వేరుశనగపప్పులను వేయించుకొని చల్లారిన తర్వాత పొట్టు తీయాలి. నువ్వులు, వేరుశనగపప్పు, కొబ్బరి తురుములను కచ్చాపచ్చాగా పొడి చేసుకోవాలి. దీనికి రాగి పిండి, యాలుకలు కలిపి అన్ని కలిసే విధంగా మిక్సీ వేసుకోవాలి.
తగినన్ని నీళ్ళు తీసుకొని దానికి బెల్లం తురుము కలిపి తక్కువ మంటపై ఉడికించుకోవాలి. దీనిని కొద్దిగా నీటిలో కలిపితే చిన్న ఉండలా కట్టుకోవాలి. ఉండ కట్టుకునేంత వరకు ఉడికించుకోవాలి. దీనికి నెయ్యి కూడా కలుపుకోవాలి. బెల్లం పాకం తయారైన తర్వాత స్టౌవ్‌ ఆపి, రాగి పిండిని ఉండలు కాకుండా కలుపుకోవాలి. ఈ మిశ్రమం చల్లారిన తర్వాత లడ్డులుగా ఒత్తుకోవాలి. అంతే రాగి లడ్డ్డూలు రెడీ.
సంగటి
కావలసిన పదార్థాలు: రాగి పిండి - 500గ్రా, ఉప్పు- తగినంత
తయారుచేసే పద్ధతి: రాగి పిండిని ముందుగా చల్లని నీటిలో ఉండలు కట్టకుండా కలుపుకోవాలి. దీనిని స్టౌవ్‌ మీద పెట్టి ఉండలు కట్టకుండా కలుపుకుంటూ ఉడికించుకోవాలి. దీనికి తగినంత ఉప్పును చేర్చుకోవాలి. అడుగంటకుండా దగ్గరే ఉండి కలుపుకుంటూ ఉండాలి. ఇది ముద్దలాగా ఒక దగ్గరికి చేరిన తర్వాత దించేయాలి. అంతే రాగి సంగటి రెడీ! దీనిని చిన్న చిన్న ముద్దలుగా చేసుకోవాలి. దీనికి నాటు కోడి పులుసు, తోటకూర పులుసు, నల్లకారం మంచి కాంబినేషన్‌. దీని రుచే వేరు.ఇది తింటే చాలాసేపటి వరకూ ఆకలి కూడా వేయదు. మంచి ఆరోగ్యం కూడా!
రాగి జావ:
కావలసిన పదార్ధాలు: రాగులు - ఒక కప్పు, పాలు - ఒక కప్పు, చక్కెర లేదా బెల్లం - తగినంత, ఉప్పు - చిటికెడు.
తయారీ: రాగులను ఒక రోజంతా నానబెట్టాలి. ఉదయం వాటిని ఒక బట్టలో వేసి మూటకట్టి, నీళ్ళను వడగట్టుకోవాలి. తర్వాత నీరెండలో నాలుగు గంటల పాటు ఎండబెట్టాలి. ఆ తర్వాత రాగులను కడాయిలో పోసి దోరగా వేయించి, మెత్తగా పిండి పట్టించాలి. ఇలా పట్టించిన పిండిని రాగి జావ కోసం వాడుకోవచ్చు. ముందుగా రాగి పిండిని కొద్దిగా తీసుకొని చల్లని నీటిలో ఉండలు కట్టకుండా కలుపుకోవాలి. ఇప్పుడు ఒక గిన్నెలో నీళ్లు పోసి వేడి చేయాలి. నీళ్ళు వేడెక్కాక తడిపిన రాగుల మిశ్రమాన్ని ఇందులో పోస్తూ కలుపుతూ ఉండాలి. కొద్దిగా ఉడికాక పాలు, బెల్లం, ఉప్పు వేసి బాగా కలపాలి. అంతే వేడి వేడి రాగి జావ రెడీ.
రాగి పుట్టు:
కావలసిన పదార్ధాలు: రాగి పిండి - ఒక కప్పు, నెయ్యి - ఒక టేబుల్‌ స్పూను, కొబ్బరి తురుము - నాలుగు టేబుల్‌ స్పూన్లు, ఉప్పు - తగినంత, పంచదార - నాలుగు టేబుల్‌ స్పూన్లు, నీళ్ళు - పావు కప్పు.
తయారుచేసే పద్ధతి: రాగి పిండిని మూకుడులో వేసి సన్నని సెగ మీద ఐదు నిమిషాల పాటు వేగించి చల్లార్చాలి. చల్లారిన పిండిలో అర టేబుల్‌ స్పూను ఉప్పు వేసి కొద్దిగా నీళ్ళు చిలకరించుకుంటూ, ముద్దలా కాకుండా పొడిపొడిగా ఉండేలా కలపాలి. దీన్ని ఇడ్లీ గిన్నెలో పెట్టి పది నిమిషాల పాటు ఆవిరికి ఉడికించాలి. ఉడికించిన రాగి ఇడ్లీలను పొడిగా చేసుకొని, దానిలో నెయ్యి, కొబ్బరి తురుము, పంచదార, దాల్చిన చెక్క పొడి వేసి బాగా కలియబెట్టాలి. ఎంతో ఆరోగ్యకరమైన రాగి పుట్టు రెడీ. అయితే చక్కెర వద్దనుకునే వారు నూనెలో రెండు ఎండుమిరపకాయలు, కరివేపాకు రెబ్బలు, ఆవాలు వేసి కూడా కలుపుకోవచ్చు.
అంబలి:
కావాల్సిన పదార్థాలు :
రాగి పిండి : కప్పు.
ఉప్పు: తగినంత.
అన్నంగంజి లేక నీరు 2 గ్లాసులు.
చింత పండు :2 రెక్కలు.
తయారుచేసే పద్ధతి : రాగి పిండిని ముందురోజు రాత్రి కొన్ని మంచినీరు పోసి కలిపి, అందులో చింత పండు రెక్కలు వేసి పెట్టాలి. ఉదయం చింతపండు తీసేయాలి. స్టావ్‌ పైన గిన్నే పెట్టి దానిలో గంజి లేక నీరు పోసి మరిగించాలి, అందులో పైన కలిపి ఉంచిన మిశ్రమాన్ని పోసి, ఐదు నిముషాల పాటు మరిగించి దగ్గరకు అయ్యాక ఉప్పు వేసి దించాలి. ఉప్పు ఇష్టం లేని వారు బెల్లం కూడా వేసుకోవచ్చు. దీనిని వేడిగా ఉన్నప్పుడే కాక, చల్లారిన తర్వాతా తీసుకోవచ్చు. ఇందులో మజ్జిగ లేక పెరుగు కలిపి తాగినా బాగుంటుంది.ఇది తాగితే ఎండాకాలం కడుపు చల్లగా, హాయిగా అనిపిస్తుంది.
వడలు
కావల్సిన పదార్థాలు : రాగి పిండి రెండు కప్పులు, ఉప్పు.రుచికి సరిపడినంత, జీలకర్ర- టీ స్పూన్‌, ధనియాలు-టీ స్పూన్‌, ఉల్లిపాయ-1 పచ్చిమిర్చి-4, నూనె-వేయించడాని సరిపడినంత, వంటసోడా-చిటికెడు, అల్లం వెల్లుల్లిముద్ద - టీ స్పూన్‌, కొత్తిమీర, పుదీన కొద్దిగా
తయారుచేసే పద్ధతి : రాగి పిండిలో ఉప్పు, వంటసోడా, జీలకర్ర, ధనియాలు, అల్లం వెల్లులి ముద్ద, సన్నగా తరిగిన ఉల్లిపాయ, పచ్చిమిర్చి ముక్కలు, తరిగిన కొత్తిమీర, పుదీనా వేసి కొన్ని నీళ్ళు పోసి వడల పిండిలా కలిపి ఒక అర్ధగంట నాననివ్వాలి. స్టౌవ్‌ వెలిగించి బాండీ పెటి,్ట నూనె పోసి, వేడేక్కిన తరువాత అందులో కలిపి పెట్టుకున్న పిండిని వడల మాదిరిగా వత్తి, నూనెలో బంగారు రంగు వచ్చే వరకూ వేయించుకోవాలి. అంతే ఎంతో రుచికరమైన, రాగి వడలు తయార్‌. ఇవి తింటుంటే భలే రుచిగా ఉంటాయి.
పోషక విలువలు
100గ్రా రాగులలో ఉండే పోషక విలువలు: ప్రోటీన్‌ - 7.3 గ్రా, కొవ్వు - 1.3గ్రా, కార్బోహైడ్రెట్స్‌ - 72 గ్రా, ఖనిజాలు - 2.7గ్రా, ఐరన్‌ - 3.9మి.గ్రా , కాల్షియం - 344 మి.గ్రా, ఫైబర్‌ 3.6 గ్రా, శక్తి - 328 కిలో కెలరీలు.